Ish-pjesëtari i Ushtrisë Çlirimtare të Kosovës (UÇK), Fadil Pushkolli, është arrestuar të martën mbrëma në territorin e Maqedonisë së Veriut. Njoftimi është bërë i ditur nga vetë Pushkolli përmes një postimi në profilin e tij në rrjetin social Facebook. Arrestimi ka ndodhur në pikën kufitare Bllacë–Hani i Elezit, bazuar në një urdhërarrest të lëshuar nga autoritetet e Serbisë.
Sipas njoftimit të publikuar nga vetë ai, ndalimi lidhet me pjesëmarrjen e tij të mëparshme në radhët e UÇK-së. Pushkolli u ka kërkuar institucioneve të Republikës së Kosovës që të ndërmarrin masa të shpejta për trajtimin e këtij rasti dhe mbrojtjen e të drejtave të tij. Aktualisht, ai është duke u mbajtur në pikën kufitare për t'iu nënshtruar procedurave të intervistimit nga autoritetet maqedonase.
Ky rast është i fundit në një seri zhvillimesh ku ish-pjesëtarë të UÇK-së përballen me arrestime bazuar në urdhërarreste të lëshuara nga Serbia. Para dy vitesh, në të njëjtin shtet, ishte arrestuar ish-pjesëtari i UÇK-së, Blerim Ramadani, i cili u lirua më pas me kusht. Ndërkohë, gjatë ditës së sotme është njoftuar lirimi i Bajram Bajramit, një tjetër ish-pjesëtar i UÇK-së, i cili ishte ndaluar muajin e kaluar nga autoritetet e Kroacisë në bazë të një urdhërarresti të ngjashëm.
Përditësime
Autoritetet e Maqedonisë së Veriut liruan ish-luftëtarin e UÇK-së, Fadil Pushkolli, pak orë pas ndalimit në pikën kufitare Bllacë–Hani i Elezit. Pushkolli konfirmoi se trajtimi nga ana e zyrtarëve policorë maqedonas ka qenë korrekt dhe profesional gjatë gjithë procedurës.
Fadil Pushkolli është liruar pas përfundimit të procedurave të intervistimit nga autoritetet maqedonase. Ai ka shprehur mirënjohje të veçantë për trajtimin korrekt dhe profesional nga ana e pjesëtarëve shqiptarë të Policisë së Maqedonisë së Veriut gjatë kohës së qëndrimit në stacion.