Policia e Kosovës ka arrestuar në Prishtinë shtetasin kosovar me inicialet M. Sh., i cili kërkohej me urdhërarrest ndërkombëtar nga autoritetet e Maqedonisë së Veriut. Arrestimi u realizua më 11 mars 2026 rreth orës 23:00.
Zyrtarët e Drejtorisë për Bashkëpunim Ndërkombëtar Policor kryen arrestimin në bashkëpunim dhe koordinim me njësitë e tjera policore. I arrestuari kërkohej përmes INTERPOL-it për veprat penale bashkim kriminal, evazion fiskal dhe mashtrim.
Me urdhër të prokurorit kujdestar, i dyshuari u dërgua në ndalim policor për 48 orë. Ndaj tij do të vazhdojnë procedurat e mëtejshme ligjore.