Shtetasi Enver Zhjeqi, 57 vjeç, i lindur në Kosovë, është arrestuar në qytetin e Durrësit në kuadër të operacionit policor të koduar “Wanted 38”. Arrestimi u krye në lagjen nr. 13 pas informacioneve të siguruara në rrugë operative nga specialistët e Seksionit për Mbështetjen Operacionale të Hetimit pranë DVP Durrës.
Sipas njoftimit të autoriteteve, 57-vjeçari ishte shpallur në kërkim ndërkombëtar pasi Gjykata e Prishtinës e ka dënuar me 3 vjet e 6 muaj burgim për kryerjen e veprave penale të “Falsifikimit të dokumenteve” dhe “Mashtrimit”. Ky arrestim është bërë me qëllim ekstradimin e tij drejt Kosovës, ku ai do të vuajë dënimin e dhënë nga drejtësia.
Aktualisht, Interpol Tirana është duke bashkëpunuar me autoritetet homologe të Kosovës për të ndjekur procedurat e mëtejshme ligjore që do të mundësojnë dorëzimin e të arrestuarit te autoritetet kosovare.