Një operacion i zhvilluar nga Prokuroria Themelore në Prishtinë në koordinim me Policinë e Kosovës, konkretisht me Drejtorinë për Hetimin e Krimeve Ekonomike dhe Korrupsionit (DHKEK), ka rezultuar me arrestimin e një personi të kërkuar ndërkombëtarisht. Hetimet kishin nisur më 17 qershor 2026, kur personi në fjalë, duke përdorur inicialet B.K., ishte paraqitur në Agjencinë e Regjistrimit Civil (ARC) për të vazhduar dokumentet e identifikimit.
Gjatë procedurave të verifikimit, zyrtarët konstatuan se identiteti i paraqitur i përkiste një personi të ndjerë prej shumë vitesh. Pas këtij zbulimi, i dyshuari u shoqërua në polici. Ai ka shfrytëzuar të drejtën ligjore për të mos dhënë deklaratë dhe, pas ndalimit fillestar prej 48 orësh, Gjykata kompetente caktoi ndaj tij masën e paraburgimit.
Përmes bashkëpunimit me Interpolin, Europolin dhe autoritetet e Gjermanisë, Francës, Austrisë, Belgjikës, Shqipërisë dhe Hungarisë, u zbulua se i ndaluari kishte përdorur pesë identitete të ndryshme në shtete të ndryshme evropiane, kryesisht të lidhura me Greqinë, Shqipërinë dhe Kosovën. Pas shkëmbimit të të dhënave biometrike dhe gjurmëve të gishtërinjve, u konfirmua se identiteti i tij i vërtetë i përkiste shtetasit shqiptar E.K..
Sipas konfirmimeve nga autoritetet e Shqipërisë, i arrestuari ishte në kërkim ndërkombëtar me njoftim të kuq (Red Notice) dhe është i dënuar me 17 vjet burgim për veprat penale “Vrasje” dhe “Shtrëngim me anë të kanosjes ose dhunës për dhënie të pasurisë”.