Policia e Shtetit arrestoi në Tiranë shtetasin kosovar Anton Allakaj, të shpallur në kërkim ndërkombëtar, për ekstradim drejt Kosovës. Ai akuzohet se rreth 25 vite më parë kreu një vrasje në Kosovë për hakmarrje.
Gjykata e Pejës e dënoi me 11 vjet e 6 muaj burgim për veprën penale "Vrasja". Nga ky dënim, atij i mbeten për të vuajtur 9 vjet e 8 muaj.
Gjatë kontrollit, policia i gjeti Allakajt dokumente identifikimi të dyshuara si të falsifikuara, ku përdorte emrat Naser Muja dhe Ded Dedaj për t’u fshehur.
Arrestimi u krye në kuadër të bashkëpunimit ndërkombëtar mes autoriteteve shqiptare dhe kosovare. Procedurat për ekstradimin kanë nisur dhe materialet i janë kaluar Prokurorisë për veprime të mëtejshme.
Përditësime
Autoritetet shqiptare përfunduan sot ekstradimin e Anton Allakajt drejt Kosovës. I dënuari kaloi kufirin përmes pikës së Vërmicës dhe iu dorëzua zyrtarisht Drejtorisë Rajonale të Policisë në Pejë. Allakaj do të dërgohet në qendrën përkatëse korrektuese për të vuajtur dënimin e mbetur prej 9 vitesh e 8 muajsh burgim.