Prokuroria Themelore në Gjakovë, Departamenti i Përgjithshëm, ka nxjerrë aktvendim për fillimin e hetimeve ndaj të dyshuarit me inicialet M.I. dhe ka paraqitur kërkesë në Gjykatën Themelore Gjakovë – Dega Rahovec për caktimin e masës së paraburgimit në kohëzgjatje prej 30 ditësh.
Të dyshuari u arrestua më 21 shkurt 2026 në flagrancë në Rahovec, gjatë pranimit të shumës prej 700 eurosh nga i dëmtuari H.F., në kuadër të masave të veçanta hetimore. Ai dyshohet se që nga qershori 2024 ka dhënë borxh me kamatë të paligjshme, duke shfrytëzuar gjendjen e rëndë financiare të viktimës, i cili kishte nevojë për të holla për shërim.
Viktima mori 7.000 euro borxh dhe paguante 700 euro çdo muaj si kamatë. Deri në fillimin e hetimeve, ai kishte paguar gjithsej 14.000 euro vetëm për kamatë. Gjatë operacionit policor u bastisën shtëpia dhe pasuritë e të dyshuarit, ku u gjetën prova lidhur me aktivitetin kriminal.
Pas intervistimit nga prokurori, M.I. u vendos nën masën e ndalimit për 48 orë. Hetimet vijojnë për veprën penale të fajdesë sipas nenit 331 paragrafi 2 lidhur me paragrafin 1 të Kodit Penal të Republikës së Kosovës.