Prokuroria Themelore në Prizren ka paraqitur kërkesë për caktimin e masës së paraburgimit ndaj një të pandehuri, i dyshuar për veprën penale "Fajdeja", ndërsa një person tjetër i përfshirë në rast ndodhet në arrati dhe është në kërkim nga organet kompetente.
Sipas hetimeve, të dyshuarit në bashkëkryerje kanë shfrytëzuar gjendjen e rëndë financiare të të dëmtuarit për të përfituar shuma të konsiderueshme parash. Marrëveshja për huazimin ishte lidhur në shtator të vitit 2021, me një vlerë prej 50,000 eurosh, e cila është shoqëruar me kushte të rënda financiare dhe kamata mujore.
Nëpërmjet presionit të vazhdueshëm ndaj të dëmtuarit dhe familjarëve të tij, të dyshuarit kanë kërkuar kthimin e shumave shumëfish më të larta se huaja fillestare. Deri më tani, rezulton se viktima ka paguar rreth 150,000 euro, pa llogaritur borxhin bazë prej 50,000 eurosh.
Krahas hetimeve për fajde, Prokuroria ka bërë të ditur se është duke zhvilluar procedura hetimore edhe ndaj një personi të tretë, i cili dyshohet për veprën penale "Manipulimi me prova", pasi ka tentuar të pengojë procesin penal.