Prokuroria Themelore në Prizren, Departamenti i Krimeve të Rënda, ka ngritur aktakuzë ndaj E.K. për fajde dhe detyrim. E.K. dhe A.K. akuzohen gjithashtu për fajde të kryer në bashkëkryerje. Sipas aktakuzës, nga viti 2021 e në vazhdim, E.K. dyshohet se i ka dhënë B.Ç.-së shuma të ndryshme parash, duke shfrytëzuar gjendjen e tij të rëndë financiare dhe duke kërkuar përfitime dukshëm joproporcionale. Prokuroria thotë se vetëm nga kamatat ka përfituar mbi 400 mijë euro.
Aktakuza e ngarkon E.K. edhe me detyrim. Sipas Prokurorisë, ai e ka detyruar B.Ç.-në të vazhdonte pagesën e kamatave dhe të mos e denonconte rastin në polici, përmes kanosjeve serioze dhe presionit. E.K. dyshohet se e ka kërcënuar me vrasjen e tij dhe të anëtarëve të familjes. Prokuroria thotë se veprimet i kanë shkaktuar viktimës dëm pasuror, frikë, ankth dhe pasiguri për jetën e tij dhe të familjarëve.
Në marrëdhënien financiare u përfshi edhe viktima e dytë, B.B., i cili, sipas aktakuzës, mori para nga të pandehurit për ta ndihmuar B.Ç.-në të shlyente borxhin. Prokuroria thotë se E.K. dhe A.K. kërkuan 550 mijë euro për shkak të kamatave të grumbulluara. Më pas, gjatë një bisede me viktimën, njëri prej të pandehurve i kërkoi 450 mijë euro dhe kalimin në pronësi të lokaleve afariste dhe të një shtëpie, me vlerë të përgjithshme rreth 1 milion euro.
Më 11 mars 2026, të pandehurit shkuan me viktimën dhe nënën e tij fillimisht në zyrën e përmbaruesit privat, për të vijuar më pas me procedurat noteriale të kalimit të pronës. Sipas Prokurorisë, policia ndërhyri gjatë zbatimit të masave të veçanta hetimore dhe arrestoi të pandehurit.
Prokuroria ka zgjeruar hetimet edhe për veprën penale të pastrimit të parave. Janë ngrirë disa patundshmëri dhe është propozuar konfiskimi i parave të gatshme, dy automjeteve, akteve të ndryshme noteriale dhe provave të tjera materiale. Prokurori i çështjes i ka propozuar gjykatës që, pas shqyrtimit gjyqësor dhe vlerësimit të provave, të pandehurit të shpallen fajtorë dhe të dënohen sipas ligjit.