Një 35-vjeçar shqiptar, i shpallur në kërkim ndërkombëtar prej tre vitesh nga autoritetet shqiptare, u arrestua në Moncalieri të Italisë. Ngjarja ndodhi gjatë një kontrolli rutinë në rrugë nga policia italiane.
Sipas mediave italiane, në momentin e ndalimit ai paraqiti një kartë identiteti dhe një patentë shoferi spanjolle. Pas verifikimeve në komisariatin e policisë së Torinos, rezultoi se dokumentet ishin të falsifikuara dhe të krijuara për të shmangur kontrollet brenda Evropës.
Hetimet nxorën se 35-vjeçari akuzohet për përfshirje në vrasje, pjesëmarrje në grup kriminal të organizuar, posedim të paligjshëm të armëve dhe furnizim me mjete për aktivitet kriminal. Ai është dënuar më parë nga Gjykata e Tiranës me tre vite e katër muaj burg.
Autoritetet italiane kanë nisur procedurat për ekstradimin e tij drejt Shqipërisë.