Një operacion policor ndërkombëtar çoi në gjetjen e një vajze 6-vjeçare dhe arrestimin e babait të saj në Kosovë. Ngjarja nisi dy javë më parë në ishullin e Majorkës, kur nëna e fëmijës njoftoi autoritetet për zhdukjen e saj, duke raportuar se ish-partneri e kishte marrë vajzën pa miratimin e saj.
Sipas Gardës Civile spanjolle, i dyshuari kishte planifikuar arratisjen në detaje, duke përfshirë fshehjen e fëmijës në bagazhin e një automjeti gjatë udhëtimit me traget nga Majorka. Për të shmangur zbulimin, ai kishte ndërmarrë veprime për të zvogëluar gjurmën e tij dixhitale, duke mbyllur llogaritë bankare dhe fshirë profilet në rrjetet sociale, ndërsa kishte ndryshuar edhe pamjen fizike.
Hetuesit zbuluan se i dyshuari kishte tentuar të mashtronte policinë duke dërguar me postë drejt Marokut një pajisje gjurmuese AirTag, të cilën vajza e kishte në çantë, me qëllim orientimin e hetimeve në rrugë të gabuar. Përmes analizës së kamerave të sigurisë, transaksioneve bankare dhe bashkëpunimit ndërkombëtar, autoritetet arritën të rindërtonin itinerarin e të dyshuarit nëpër disa vende evropiane, duke lokalizuar përfundimisht vendndodhjen e tij në Kosovë.
Pas lëshimit të një urdhër-arresti evropian dhe ndërkombëtar, operacioni i koduar "Ura" përfundoi me arrestimin e babait dhe kthimin e sigurt të fëmijës pranë nënës së saj në Spanjë.