Një 45-vjeçar shqiptar është arrestuar në Tiranë nga Policia e Shtetit në kuadër të një operacioni të përbashkët me autoritetet italiane. Ai ishte shpallur në kërkim ndërkombëtar nga Interpoli me një urdhër të lëshuar nga sekretariati i përgjithshëm në Lyon të Francës.
Hetimet u zhvilluan nga skuadra e Venecias dhe Shërbimi Qendror Operativ italian (SCO), nën koordinimin e Prokurorisë së Venecias. Autoritetet monitoruan lëvizjet e familjarëve të tij dhe zbuluan se ai kishte jetuar në Dubai të Emirateve të Bashkuara Arabe, ndërsa kohët e fundit ishte kthyer në Shqipëri. Kjo mundësoi finalizimin e operacionit në Tiranë.
I arrestuari kishte jetuar në Mestre, pranë Venecias, gjatë aktivitetit kriminal. Ai ishte dënuar përfundimisht për pjesëmarrje në një organizatë kriminale të përfshirë në trafikun e lëndëve narkotike dhe shpërndarjen e tyre. Mes viteve 2019-2021, ai konsiderohej figurë kyçe në grupin që furnizonte tregun e drogës në zonën e Venecias, duke marrë vendime të rëndësishme, menaxhuar kanalet e furnizimit dhe organizuar shpërndarjen.
Ndaj tij ishte lëshuar një Red Notice nga Interpoli që nga viti 2022, duke e klasifikuar si person me rrezikshmëri të lartë për trafik droge. Arrestimi është pjesë e projektit Wanted, një operacion i koordinuar për kapjen e personave në kërkim ndërkombëtar me profil të lartë, si në Itali ashtu edhe jashtë saj.