Një prind është arrestuar në Deçan pasi dyshohet se ka ushtruar dhunë fizike ndaj një nxënësi 11-vjeçar në oborrin e shkollës. Ngjarja ndodhi të mërkurën dhe u konfirmua nga zëdhënësi i Prokurorisë Themelore në Pejë, Shkodran Nikçi.
Sipas Nikçit, mësimdhënësit e shkollës ndërhynë për të ndaluar situatën para se të përshkallëzohej. Pas kësaj, Policia e Kosovës u njoftua dhe e arrestoi të dyshuarin, i cili u ndalua për 48 orë. Ndaj tij është iniciuar procedurë penale për veprën "lëndim i lehtë trupor". I mituri mori trajtim mjekësor.
Prokuroria thekson se nuk kishte konflikt fizik të mëparshëm, por vetëm verbal disa kohë më parë. Hetimet tregojnë se i dyshuari e ndaloi nxënësin me veturë gjatë rrugës për në shkollë, e goditi me shuplaka dhe grushta, pastaj e futi në hyrje të shkollës. Atje ndërhyri arsimtari i matematikës.
Incidenti mund të lidhet me një konflikt të mëparshëm mes fëmijëve, sipas informacioneve nga hetimet. Autoritetet po vazhdojnë punën për zbardhjen e plotë të rrethanave.