Agjencia e Mbikëqyrjes Policore, rajoni Shkodër-Lezhë, bëri të ditur se ka arrestuar në flagrancë punonjësin e policisë I.D., me detyrë shef i Logjistikës pranë Drejtorisë së Kufirit dhe Migracionit Kukës. Arrestimi u bë për dyshimin e kryerjes së veprave penale "Drejtim i automjetit në gjendje të dehur" dhe "Shkelja e rregullave të qarkullimit rrugor", të parashikuara në nenet 290/1 dhe 291 të Kodit Penal.
Ngjarja ndodhi mbrëmjen e djeshme, rreth orës 20:00, në aksin rrugor Milot-Morinë. I.D. drejtonte automjetin e tij kur u përfshi në një aksident me një automjet tjetër. Si pasojë, u dëmtuan pasagjerët e automjetit të dytë: shtetasja XH.H. dhe dy fëmijët e mitur të shtetasve Z.B. dhe S.B.. Të plagosurit ndodhen në Spitalin e Traumës në Tiranë dhe janë jashtë rrezikut për jetën.
Pas aksidentit, testi matës i alkoolit rezultoi pozitiv me nivele 1.00 mg/l dhe 0.98 mg/l. Materialet procedurale u referuan në Prokurorinë pranë Gjykatës së Shkallës së Parë të Jurisdiksionit të Përgjithshëm Lezhë për hetime të mëtejshme.
Agjencia e Mbikëqyrjes Policore thekson se mbetet e përkushtuar për zbatimin e ligjit dhe fton qytetarët të denoncojnë abuzimet nga punonjësit e policisë në numrin e gjelbër 0800 9090 ose në adresën e email-it info@ambp.gov.al.