Pas grabitjes së ndodhur ditën e djeshme në ambientet e OTP Bank në Tiranë, shërbimet e Policisë kanë arrestuar rojën e sigurisë të institucionit bankar. Sipas autoriteteve, ndalimi i punonjësit është bërë pasi ai nuk ka vepruar për të neutralizuar autorin e grabitjes në momentin e kryerjes së veprës penale.
Sipas informacioneve paraprake, ngjarja ka ndodhur ndërsa një qytetare po kryente procedurat për depozitimin e një shume prej 10 mijë paundësh. Autori i dyshuar fillimisht e ka ndjekur gruan dhe ka ndërhyrë në momentin që ajo ndodhej brenda ambienteve të bankës. Përveç shumës së marrë qytetares, i dyshuari ka arritur të grabisë edhe para nga arka e bankës.
Aktualisht, shuma e plotë e vjedhur mbetet ende e papërcaktuar me saktësi nga hetuesit. Autori i grabitjes është shpallur në kërkim dhe Policia vijon punën për identifikimin dhe kapjen e tij.