Mesditën e sotme, një grabitje me armë ka ndodhur në një filial të OTP Bank Albania në Tiranë. Sipas informacioneve paraprake, autori ka mbërritur pranë bankës me një skuter nga drejtimi i kryqëzimit të Komunës së Parisit.
I maskuar, i veshur me të zeza dhe me një çantë, autori ka hyrë në mjediset e bankës ku ka kërcënuar një klient që po kryente procedurën e depozitimit të parave. Nën kërcënimin e një sendi që dyshohet të jetë pistoletë, grabitësi ka arritur të marrë shumën prej 10 deri në 15 mijë paund, përpara se klienti të kishte dorëzuar fondet në arkën e bankës.
Pas kryerjes së grabitjes, autori është larguar me një skuter elektrik në drejtim të rrugës "Sulejman Delvina". Dyshohet se autori mund ta ketë braktisur mjetin në një garazh, ndërsa ka vijuar lëvizjen në këmbë në drejtim të zonës së ish-Bllokut. Forcat e policisë ndodhen në terren dhe po punojnë për zbardhjen e rrethanave të ngjarjes dhe kapjen e autorit.
Përditësime
Autoritetet kanë sqaruar dinamikën dhe dëmin pas grabitjes në filialin e OTP Bank pranë stadiumit 'Selman Stërmasi'. Policia e Shtetit bëri me dije se autori hyri në ambientet e bankës duke u shtirur si klient, ndërsa shuma e vjedhur rezulton të jetë 15 milionë lekë të vjetra, duke korrigjuar raportimet e mëparshme mbi vlerën në paund.
Hetimet për grabitjen e armatosur në filialin e OTP Bank në Tiranë kanë zbardhur dinamikën e ngjarjes. Sipas Policisë së Shtetit, autori ka mbajtur nën vëzhgim viktimën përpara se ajo të hynte në bankë, ku më pas u fut duke u shtirur si klient. Pas kryerjes së grabitjes, i dyshuari braktisi skuterin e përdorur për arratisje dhe u largua në këmbë përmes rrugicave të zonës së Bllokut.