Policia e Kosovës ka identifikuar dhe arrestuar shoferin që shkaktoi një aksident trafiku në fshatin Davidovc të Shtimës dhe u largua nga vendi i ngjarjes pa ofruar ndihmë.
Ngjarja ndodhi më 4 shkurt 2026, rreth orës 18:25, në rrugën magjistrale Shtime–Lipjan. Një automjet goditi një këmbësor 46-vjeçar. Shoferi nuk u ndal në vendin e ngjarjes, por u largua në drejtim të panjohur.
Këmbësori mori fillimisht ndihmë mjekësore në Qendrën e Mjekësisë Familjare në Shtime, pastaj në Qendrën Emergjente në Ferizaj dhe më vonë u transferua në Qendrën Klinike Universitare të Kosovës. Ai tani është jashtë rrezikut për jetë.
Menjëherë në vendin e ngjarjes mbërritën patrullat e Stacionit Policor Shtime, Njësia e Komunikacionit Rrugor, hetuesit e aksidenteve dhe hetuesit e Sektorit Rajonal të Hetimeve.
Pas hetimesh intensive dhe analizimit të pamjeve nga kamerat e sigurisë, më 8 shkurt 2026, rreth orës 18:30, policia identifikoi shoferin dhe automjetin: A.A., 41-vjeçar, shtetas i Republikës së Kosovës, me automjet VW Golf, ngjyrë e zezë dhe targa vendore.
Më 9 shkurt 2026, i dyshuari u intervistua nga hetuesit policorë. Me vendim të prokurorit të shtetit, ai u lirua në procedurë të rregullt për hetime të mëtejme lidhur me veprën penale "Shkaktim i aksidentit të trafikut me lëndime trupore".