Policia italiane zhvilloi një operacion në Milano, ku arrestoi një shqiptar 52-vjeçar me precedentë të mëparshëm penalë. Ngjarja ndodhi në një pallat në zonën Via San Dionigi.
Efektivët e komisariatit Mecenate kishin vënë nën vëzhgim të dyshuarin prej disa kohësh. Ata e ndoqën derisa hyri nga një derë dytësore në një pallat ku nuk banonte. Policia ndërhyri menjëherë në ambientet e brendshme dhe zbuloi se një banjo e braktisur ishte kthyer në laborator për përpunimin dhe fshehjen e drogës.
Në tavolinat e punës gjetën rreth 2.5 kg heroinë, mbi 5 kg substanca përzierëse, peshore precize, materiale paketimi dhe pajisje për presimin e drogës para shpërndarjes në treg.
Zbulimi vazhdoi me gjetjen brenda një elektroshtëpiakeje të vjetër dhe jashtë funksionit të 1.5 kg të tjerë heroinë, mbi 100 g kokainë, hashash dhe kartëmonedha false.
Hetuesit dyshojnë se ambienti shërbente si pikë përgatitjeje dhe magazinimi për shpërndarjen e drogës në Milano. Po verifikohet nëse i arrestuari kishte lidhje me rrjete të tjera të trafikut të narkotikëve në zonë.