Një shtetas italian është vënë në pranga nga Policia e Tiranës pas një ngjarjeje të ndodhur në një rrugë dytësore të kryeqytetit. Sipas të dhënave zyrtare, i dyshuari ka përfituar nga fakti se pronari e kishte lënë automjetin tip Audi Q5 të ndezur dhe pa mbikëqyrje, duke hipur në të dhe duke u larguar menjëherë nga vendngjarja.
Efektivët e Komisariatit Nr. 6 së bashku me shërbimet e Policisë Rrugore janë vënë në ndjekje të mjetit, i cili është drejtuar drejt zonës së Astirit. Gjatë tentativës për t'iu shmangur kapjes, drejtuesi ka kryer manovra të rrezikshme, duke shkaktuar përplasjen e mjetit të vjedhur me disa automjete të tjera. Në përpjekje për ta ndaluar, një punonjës policie ka mbetur i lënduar, ndonëse burimet konfirmojnë se ai nuk ka pësuar dëmtime të rënda.
Pas ndalimit dhe arrestimit, autoritetet kanë kryer verifikimet e nevojshme. Rezultatet kanë treguar se shtetasi italian ishte nën efektin e lëndëve narkotike në momentin kur kreu vjedhjen dhe ndjekjen nëpër rrugët e Tiranës. Hetimet për zbardhjen e plotë të rrethanave të ngjarjes vijojnë nën akuzën e vjedhjes dhe shkaktimit të dëmeve materiale e lëndimeve trupore.