Shemsi Shaljani, vëllai i Muçi Shaljanit (alias Sheqer), agjent i Agjencisë së Mbikëqyrjes Policore (AMP), u arrestua më 16 mars nga Gjykata e Tiranës me masën "arrest me burg" për akuzën e dhunës në familje ndaj të vejës së vëllait të tij. Muçi Shaljani mbeti i vrarë në atentatin e 11 nëntorit 2025 pranë aeroportit Nënë Tereza në Rinas, bashkë me Gilmando Danin.
Më 13 mars, e veja 40-vjeçare e Muçi Shaljanit u paraqit në polici, duke pretenduar se vëllezërit e bashkëshortit kishin ngritur pretendime për pronësinë e një objekti 4-katësh në rrugën Spiro Deda dhe dy ambienteve bar-kafe, të administruara nga i ndjeri. Ajo tha se Denis Morina, vëllai i Muçi Shaljanit nga ana e nënës, kishte marrë çelësin e hyrjes së këtij objekti.
Fillimisht nuk bëri kallëzim penal, por kërkoi ndihmë për kthimin e çelësit dhe paraqiti dokumentacion pronësie. Policia thirri Denis Morinan, arriti marrëveshje dhe çelësi u dorëzua. Palët u orientuan drejt gjykatës për pretendimet pronësore.
Më 14 mars, gruaja u paraqit sërish në komisariat dhe kallëzoi Shemsi Shaljanin për dhunë. Sipas saj, ai goditi me grushte derën e banesës dhe i kërkoi të largohej nga prona me fëmijët, duke e kërcënuar me jetë. Policia sekuestroi pamjet nga kamerat e sigurisë, mori në pyetje dëshmitarët dhe lëshoi urdhër të menjëhershëm mbrojtjeje për të.
Zhvillime në hetimin e atentatit
Prokuroria e Tiranës ka thelluar hetimet për punësimin e Muçi Shaljanit në AMP. Prokurori Bledar Valikaj mori të pandehur ish-drejtorin e komanduar Artjol Saliasin për "shpërdorim detyre", pasi Shaljani u punësua me kontratë në kundërshtim me ligjin dhe u pagua pa shkuar në punë. Më herët u mor në përgjegjësi penale Gëzim Sala, drejtor i burimeve njerëzore. Hetimet për atentatin kryhen nga SPAK.