Klubi londinez i Arsenalit pritet të përfitojë një dëmshpërfitim financiar mbi 4 milionë funte nga FIFA, pas dëmtimit të rëndë në shpinë që pësoi qendërmbrojtësi William Saliba gjatë angazhimit me përfaqësuesen e Francës në Kupën e Botës 2026.
Lojtari u detyrua të largohej nga fusha pas vetëm 30 minutash lojë në ndeshjen gjysmëfinale kundër Spanjës. Sipas raportimeve, Saliba kishte shfaqur shqetësime në shpinë që nga muaji mars, por situata u përkeqësua ndjeshëm gjatë kampionatit. Përzgjedhësi i Francës, Didier Deschamps, u shpreh se dhimbjet e mbrojtësit ishin bërë të padurueshme. Ndërhyrja kirurgjikale mbetet një mundësi, ndërsa vlerësimi përfundimtar do të kryhet nga stafi mjekësor i Arsenalit.
Kompensimi bazohet në Programin e Mbrojtjes së Klubeve të FIFA-s, i cili u ofron skuadrave mbështetje financiare kur futbollistët dëmtohen gjatë detyrave me ekipet kombëtare dhe mbeten jashtë fushave për më shumë se 28 ditë. Duke pasur parasysh pagën javore të Salibës, e cila raportohet të jetë rreth 250 mijë funte, kjo shumë do të shërbejë për të mbuluar një pjesë të pagës gjatë periudhës së rehabilitimit.
Mungesa e qendërmbrojtësit, i cili ishte një figurë kyçe në fitimin e titullit të Ligës Premier nga Arsenali, përbën një sfidë për trajnerin Mikel Arteta në prag të edicionit të ri, pasi futbollisti pritet të mungojë për 4 deri në 5 muaj.