Arsim Bajrami ka tërhequr kandidaturën për president të Kosovës pak ditë më parë dhe i është kthyer plotësisht punës akademike.
Në një intervistë për KosovaPress dhe Lajmi.net, ai shpjegoi se vendimin e mori kur u bind se partitë kryesore politike kanë hequr dorë nga një kandidat i unitetit me përvojë. “Në momentin kur partitë kryesore kanë hequr dorë nga një kandidat i unitetit, një kandidat me përvojë, atëherë unë e kam tërhequr kandidaturën sepse po shihet se liderët tanë politikë nuk janë të interesuar për ta zgjedhur një president kredibil, por më tepër një president të cilin do ta kontrollojnë dhe do ta shndërrojnë në një tejzgjatje të politikave ditore”, u shpreh Bajrami.
Sa i përket arsyes fillestare të kandidimit, ai e cilësoi atë si “akt moral, i dinjitetit profesional”. “Duke qenë se kam marrë pjesë në të gjitha proceset e shtetndërtimit, nuk kam dashur që shteti ynë të dëmtohet. Jam vetëofruar, kam ofruar shërbimet e mira vetëm si kandidat konsensual”, deklaroi ai.
Kjo vjen në kontekstin e dështimit të Kuvendit për të zgjedhur presidentin brenda afatit të 5 marsit. Presidentja Vjosa Osmani shpalli dekretin për shpërndarjen e Kuvendit një ditë më pas. Gjykata Kushtetuese vendosi më 9 mars një masë të përkohshme deri më 31 mars, që ndalon çdo veprim të presidentes Osmani dhe të Kuvendit derisa masa është në fuqi.
Kërkesa për vlerësimin e kushtetueshmërisë së dekretit u dorëzua nga kryeministri Albin Kurti në emër të Qeverisë. Arsim Bajrami, njëri nga hartuesit e Kushtetutës së Kosovës, nuk deshi të komentojë vendimin përfundimtar të Gjykatës Kushtetuese. “Po e presim të gjithë me padurim”, tha ai.
Lëvizja Vetëvendosje në seancën parlamentare të 5 marsit paraqiti në momentin e fundit kandidaturën e Fatmire M.
Përditësime
Fatmire Mulhaxha Kollçaku, kandidatja e Vetëvendosjes, u paraqit si kundërkandidate e Glauk Konjufcës në seancën e 5 marsit.