Kryetarja e Kuvendit të Kosovës, Albulena Haxhiu, deklaroi se procesi për zgjedhjen e presidentit nuk mund të nisë, pasi ka pranuar vetëm një kandidaturë. Kjo është ajo e Glauk Konjufcës, propozuar nga një pjesë e deputetëve të Lëvizjes Vetëvendosje dhe grupi multietnik me 30 nënshkrime. Haxhiu theksoi se Kushtetuta kërkon të paktën dy kandidatë të vlefshëm, secili me minimum 30 nënshkrime nga deputetët, për të thirrur seancën parlamentare.
Afati kushtetues për përmbylljen e procesit përfundon më 5 mars 2026, 30 ditë para mbarimit të mandatit të presidentes aktuale Vjosa Osmani më 4 prill 2026. Haxhiu ftoi deputetët të reflektojnë dhe të propozojnë të paktën një kandidat tjetër, duke nënvizuar përgjegjësinë kushtetuese ndaj qytetarëve. Ajo sqaroi se kërkesat për seanca të jashtëzakonshme mund të pranohen, por jo ajo për zgjedhjen e presidentit pa plotësuar kushtet procedurale.
Sipas Kushtetutës, zgjedhja zhvillohet në tre raunde votimi. Në dy raundet e para nevojiten 80 vota, pra dy të tretat e deputetëve të pranishëm (nga 120 deputetë). Në raundin e tretë mjafton shumica e thjeshtë prej 61 votash. Për vlefshmëri të procesit, në sallë duhet të jenë të pranishëm të paktën 80 deputetë në çdo raund.
Kreu i Partisë Demokratike të Kosovës, Bedri Hamza, deklaroi se partia e tij nuk ka kandidat pa marrëveshje paraprake mes partive. Ai propozoi një emër të dinjitetshëm, jo domosdoshmërisht nga strukturat e PDK-së. Kryeministri Albin Kurti u shpreh se është në pritje të diskutimeve të grupit parlamentar të Vetëvendosjes. Deputeti i PDK-së Nait Hasani tha se partia mund ta votojë Andin Hotin, nëse qëndron në sallë gjatë votimit.
Nëse presidenti nuk zgjidhet, Kuvendi shpërndahet dhe zhvillohen zgjedhje të reja parlamentare brenda 45 ditësh.
Përditësime
Presidenca përgënjeshtroi pretendimin e LVV-së se i kishte ofruar nënshkrimet dhe mbështetjen Vjosës Osmani për rizgjedhje, sipas Leartës Hollaj.
Zhvillime të tjera:
- Arbërie Nagavci garantoi votat e LVV-së për Osmanin dhe sinjalizoi se LVV-ja mund të propozojë kandidat të dytë ose të ofrojë nënshkrime për partitë e tjera.
- Haxhiu deklaroi se Kosova ka emra të përshtatshëm për t’u propozuar si president.
- Haxhiu paralajmëroi për "terren të pashkelur" dhe se pas 5 marsit çështja shkon në Gjykatën Kushtetuese, nëse nuk ka kandidat të dytë.
Haxhiu deklaroi se seanca për zgjedhjen e presidentit të Kosovës nuk mbahet sonte, më 4 mars 2026. Në konferencën për shtyp, ajo theksoi: "Ky është një moment vendimtar", duke nënvizuar "përgjegjësinë institucionale të të gjithëve".
Kryeministri Albin Kurti deklaroi më 5 mars se pasdite do të vazhdojnë përpjekjet për zgjedhjen e presidentit dhe se shpreson për një kandidaturë të dytë.
- Glauk Konjufca u shpreh se opozita (PDK dhe LDK) duhet të propozojë një kandidat të dytë, të cilin ai mund ta votojë.
- PDK dhe LDK akuzojnë Vetëvendosjen për paaftësi, papërgjegjëshmëri dhe mungesë konsensusi, duke paralajmëruar një krizë institucionale.
LVV propozoi Fatmire Kollçaku (Mulhaxha-Kollçaku) si kandidate të dytë për president, duke plotësuar kushtin për dy kandidatë.
Seanca për zgjedhjen e presidentit filloi më 5 mars 2026 rreth orës 22:00.
Opozita (PDK, LDK) bojkoton seancën.
Vetëm 64-66 deputetë janë të pranishëm në sallë; mungon kuorumi i 80 deputëve.
Haxhiu bëri thirrje për pjesëmarrje dhe kërkoi verifikimin e kandidatëve nga komisioni.
Arben Haxhiu ka ndërprerë seancën për mungesë kuorumi, me 66 deputetë të pranishëm dhe 54 të munguar.
- LVV ka paraqitur kërkesë në Gjykatën Kushtetuese për kushtetutshmërinë e procedurës dhe ka kërkuar masë të përkohshme për pezullimin e afatit kushtetues.
- Haxhiu ka njoftuar Presidenten Vjosa Osmani për kërkesën.
- Haxhiu ka premtuar vazhdimin e seancës sapo të plotësohen kushtet.