Albulena Haxhiu, kryetare e Kuvendit të Kosovës, deklaroi se po pret kandidaturat për postin e presidentit bashkë me 30 nënshkrime mbështetëse nga dy kandidatë, për të thirrur seancën e zgjedhjes.
Ajo e bëri këtë deklaratë pas takimit me kryetarët e komisioneve parlamentare, ku u diskutua mbarëvajtja e punës së legjislaturës së dhjetë, përfshirë plotësimin e 36 pozita vakante në institucionet e pavarura.
Sipas Haxhiut, paraprakisht do të mbahen takime me të gjitha partitë politike të përfaqësuara në Kuvend për të adresuar përgjegjësitë. Procedura duhet të përfundojë deri më 4 mars, ndonëse mandati i presidentes aktuale Vjosa Osmani përfundon zyrtarisht në fillim të muajit prill.
Vjosa Osmani ka shprehur synimin për një mandat të dytë, por zyra e saj nuk ka dhënë përgjigje për veprimet e ndërmarra për të siguruar përkrahjen në Kuvend.
Kryeministri Albin Kurti, i cili drejton Lëvizjen Vetëvendosje me shumicën në Kuvend, ka paralajmëruar takime me liderët e subjekteve politike që nga java e kaluar, por deri tani nuk janë regjistruar lëvizje në këtë drejtim. Ai u shpreh i gatshëm për diskutime me opozitën mbi zgjedhjen e presidentit të ri.