Artan Hoxha, gazetar investigativ, ka analizuar arratisjen e të paraburgosurit Altin Ndoci nga burgu i Durrësit në një lidhje me emisionin Dita Jonë në A2 CNN.
Ai ka shprehur dyshime për vendimin e transferimit të Ndocit në një spital civil në Durrës, duke u mbështetur në pamjet e publikuara. Sipas Hoxhës, këto pamje dëshmojnë se Ndoci nuk ishte i sëmurë, por ndodhej në gjendje të shkëlqyer fizike. "Ajo që pamë në pamje dëshmonte që ai jo vetëm nuk dukej njeri i sëmurë që kishte nevojë për trajtim, po ai ishte një sprinter tjetër, dukej si Luiza Gega, dukej sikur kishte hyrë 3000 metërsh dhe aty nuk e kapte dot më njeri", ka thënë Hoxha.
Hoxha ka theksuar hapin e shpejtë të Ndocit në foton e parë dhe videon e arratisjes, që dëshmon aftësinë për t'u arratisur nga punonjësit e policisë së burgut. Ai e ka vlerësuar Ndocin si person me rrezikshmëri të lartë shoqërore, të hetuar nga SPAK për ngjarje të rënda kriminale.
Gazetari ka kritikuar vendosjen e Ndocit në burgun e Durrësit, të cilin e ka përshkruar si institucion me lehtësira të mëdha për të paraburgosurit krahasuar me burgjet e tjera. "Është një burg që gati-gati cilësohet si një kamping", ka thënë ai, duke përmendur se aty mbahen kryesisht ish-funksionarë të lartë shtetërorë, funksionarë politikë dhe të zgjedhur vendorë.
Sipas Hoxhës, pamjet e dinamikës së arratisjes e bëjnë situatën gati qesharake, duke nxjerrë në pah probleme në sistemin e sigurisë. Ai ka theksuar se një person me profilin e Ndocit nuk duhej të mbantej në një burg me nivel të ulët sigurie.