Ish-drejtuesi i policisë Shemsi Prençi, i ftuar në studion e News24, komentoi arratisjen e të paraburgosurit Altin Ndocaj nga spitali i Durrësit. Ai theksoi se nuk është zbatuar asnjë procedurë ligjore dhe përgjegjësia shtrihet përtej drejtuesit të burgut.
Sipas Prençit, urdhri për shkarkimin e drejtorit të burgut dhe të zinxhirit komandues nuk mjafton. "Ata duhej të ishin arrestuar në flagrancë. Unë mendoj se janë implikuar", u shpreh ai, duke e cilësuar rastin më të rëndë se një shpërdorim i thjeshtë detyre.
Prençi vlerësoi si të pamundur trajtimin e ngjarjes si neglizhencë administrative, kur Ndocaj akuzohet për katër vrasje. "Nuk mund të quhet shpërdorim detyre kur një person i tillë lirohet pa pranga dhe trajtohet si qytetar i lirë. Këtu mund të ketë pagesa shumë të mëdha, edhe deri në 1 milion euro, që dikush të marrë përsipër një veprim të tillë", deklaroi ai.
Ai theksoi se mënyra se si i paraburgosuri lëvizi lirshëm tregon se nuk bëhet fjalë për një situatë rastësishme. "Sapo shfaqet kamera, fakti që ai lëvizte i lirë tregon se kjo gjendje është lejuar nga vetë autoritetet. I paraburgosuri kishte kushte për të vrapuar dhe për t’u arratisur, kushte që ia ka krijuar vetë drejtoria e burgut", shtoi Prençi.