Përplasja mes biznesmenëve Luan Muça dhe Vasil Bedinaj, e ndodhur më 3 shtator në Vlorë, ka rikthyer vëmendjen te konflikti pronësor mbi një sipërfaqe toke në Palasë. Vasil Bedinaj ka pretenduar se Luan Muça i ka kërkuar një gjobë prej 5 milionë eurosh, akuzë e cila është mohuar kategorikisht nga Muça.
Në një përgjigje për emisionin "Top Story", Agjencia Shtetërore e Kadastrës sqaroi se subjekti "Delta" sh.a., në pronësi të Luan Muçës, ka depozituar dokumentacion ligjor për tituj pronësie në periudhën 2019-2021 dhe është pajisur me leje ndërtimi për resortin "Delta Falaise resort & village" më 24 korrik 2024. Ndërkohë, për subjektin tjetër të përfshirë në mosmarrëveshje, rezulton se nuk ka kërkesë apo vërtetim pronësie për zonën në fjalë.
ASHK ka bërë të ditur se në korrik të vitit 2024 është lëshuar një vërtetim pronësie në emër të një individi tjetër për këtë hapësirë, dokumentacion të cilin agjencia e ka kallëzuar në Strukturën e Posaçme Antikorrupsion (SPAK) që në vitin 2025, për shkak të dyshimeve të arsyeshme për falsifikim.
Sipas agjencisë, zona në fjalë i përket zonës kadastrale nr. 1739, për të cilën procesi i regjistrimit fillestar është planifikuar të përfundojë brenda vitit 2027, në bashkëpunim me Bashkinë Himarë. Për momentin, çështja e pronës ndodhet në proces gjyqësor, ndërsa qeveria ka marrë vendimin për shpronësimin e tokës për shkak të zhvillimeve turistike në vijën bregdetare.
Përditësime
Agjencia për Zhvillim të Territorit (AZHT) sqaroi se konflikti për pronën në Palasë nuk lidhet me lejet e ndërtimit, pasi nuk ka vendime pozitive për aplikimet e reja. Sipas AZHT: Leja e vetme në fuqi mbetet ajo për 'Delta Falaise Resort & Village, Zona 1'. Aplikimi i dytë i kompanisë 'Delta' për Zonat 1 dhe 2 është refuzuar për shkak të pasaktësive në dokumentacionin AMTP. Kërkesa e kompanisë 'Regina Group Construction', e depozituar më 24 prill 2026, mbetet e pamiratuar nga KKTU për shkak të verifikimeve të detyrueshme mbi pronësinë dhe mbivendosjet kadastrale.
Agjencia për Zhvillim të Territorit (AZHT) sqaroi procedurat teknike për aplikimet në zonën e Palasës. Sipas institucionit, aplikimi i kompanisë Delta për Zonat 1 dhe 2 është bllokuar pasi 11 dokumente (AMTP) nuk përputhen me sistemin GIS. Në të njëjtën kohë, Këshilli Kombëtar i Territorit dhe Urbanistikës (KKTU) e la me kusht aplikimin e Regina Group Construction për resortin 'Regina Collection Palasë', për shkak të nevojës për verifikim të mbivendosjeve kadastrale. AZHT zyrtarizoi se konflikti mes biznesmenëve nuk lidhet me lejet e ndërtimit, pasi aktualisht leja e vetme në fuqi është ajo e resortit 'Delta Falaise'.