Pas një bllokimi tre-ditor, SPAK ka vendosur të lirojë llogaritë bankare të kompanisë Albania Land Development, e cila është e angazhuar në ndërtimin e një resorti turistik në Zvërnec. Vendimi për zhbllokimin e shumës prej 195 milionë dollarësh u mor këtë të hënë, duke i bërë mjetet sërish të përdorshme.
Hetimi, i nisur nga SPAK disa javë më parë, përqendrohet te dyshimet për një skemë të tjetërsimit të pronave shtetërore në duar private. Në kuadër të këtyre veprimeve, agjentët e Byrosë Kombëtare të Hetimit (BKH) kanë ushtruar kontrolle ndaj njërit prej administratorëve të kompanisë, Redi Struga. Në qendër të hetimeve për tjetërsimin e pronave përmendet edhe shtetasi Artur Shehu, i cili aktualisht banon në Shtetet e Bashkuara të Amerikës.
Kryeministri i Shqipërisë, Edi Rama, u shpreh publikisht mbi këtë çështje, duke deklaruar se investitorët ndërkombëtarë i kanë blerë tokat përmes transaksioneve bankare dhe se bllokimi i mjeteve financiare është veprim arbitrar. Kreu i qeverisë theksoi se hetimet për pronësinë mund të vijojnë, por pa penguar investimet e huaja, të cilat përllogariten në një vlerë totale prej 4 miliardë eurosh.
Edhe pse llogaritë janë zhbllokuar, SPAK vijon të hetojë procedurat e blerjes dhe titujt e pronësisë së tokës mbi të cilën do të zhvillohet projekti luksoz.