Prokuroria e Posaçme Kundër Korrupsionit dhe Krimit të Organizuar (SPAK) ka ndërmarrë një seri kontrollesh në banesa dhe zyra në Tiranë e Vlorë, në kuadër të një hetimi për tjetërsimin e pronave në zonën bregdetare të Zvërnecit. Veprimet procedurale synojnë sigurimin e provave mbi një skemë të dyshuar të falsifikimit të dokumentacionit të pronësisë dhe pastrimit të parave.
Mes personave ndaj të cilëve po ushtrohen kontrolle janë:
• Pëllumb Petritaj, ish-avokat, i cili dyshohet se ka falsifikuar dokumente pronësie në favor të Artur Shehut.
• Redi Struga, inxhinier dhe administrator i kompanisë projektuese “InfraKonsult” sh.p.k.
• Leonard Bisha, për të cilin nuk janë bërë ende të ditura detajet specifike mbi akuzat.
Sipas hetimeve, kompania e Redi Strugës, nëpërmjet subjektit “Albanian Land Development”, ka shërbyer si urë lidhëse me investitorët nga Katari, Ramez dhe Mohamad Al-Khayyat, të cilët janë përfshirë në projekte turistike krah Jared Kushner, dhëndrit të ish-Presidentit amerikan Donald Trump.
Burime nga prokuroria bëjnë me dije se këto prona kanë kaluar dorë më dorë, duke përfshirë edhe transaksione nga subjekte të tjera, si kompania “SERE” e Grupit Balfin. Gjykata e Posaçme Kundër Korrupsionit dhe Krimit të Organizuar (GJKKO) ka hapur më parë hetime ndaj Artur Shehut për dyshime të pastrimit të parave, ndërsa procesi aktual synon të zbardhë mekanizmin e plotë të përvetësimit të paligjshëm të pronave në një nga zonat më të lakmuara të bregdetit shqiptar.
Përditësime
Prokuroria e Posaçme (SPAK) ka sekuestruar pajisje elektronike dhe dokumente gjatë kontrolleve në Tiranë dhe Vlorë. Operacioni është pjesë e hetimeve për konfliktet e dhunshme lidhur me pronësinë e plazhit të Dalanit, në Zvërnec.