Hetimet e nisura nga SPAK në lidhje me pronat në zonën e Zvërnecit janë në një fazë të avancuar, bëri të ditur gazetarja Klodiana Lala. Ajo theksoi se procesi hetimor ka nisur rreth 18 muaj më parë dhe po zhvillohet me veprime konkrete procedurale.
Në kuadër të këtyre hetimeve janë ushtruar kontrolle në banesa dhe zyra të biznesmenëve, si dhe të personave që dyshohet se kanë lidhje me Artur Shehun, shtetas me banim në Shtetet e Bashkuara të Amerikës. Gjatë këtyre kontrolleve, autoritetet kanë sekuestruar pajisje elektronike, përfshirë celularë.
Sipas informacioneve, dosja përmban materiale komplekse, duke përfshirë përgjime që mund të kenë ardhur nga bashkëpunimi me prokurori të huaja, të cilat kanë hetuar grupe të strukturuara kriminale. Hetimi po vëzhgon lidhjet mes biznesit dhe eksponentëve të botës së krimit, ndërsa vlerësohet se zhvillimet mund të prekin nivele të larta të politikës dhe administratës.