Prokuroria e Posaçme ka urdhëruar sekuestron e llogarive bankare të shoqërisë Albania Land Development, në kuadër të një hetimi që lidhet me procedurat e pronësisë në zonën bregdetare të Zvërnecit.
Sipas të dhënave të dosjes hetimore, administratori Redi Struga i është nënshtruar kontrollit nga agjentët e Byrosë Kombëtare të Hetimit (BKH). Ai dyshohet se ka shërbyer si ndërmjetës në marrëdhëniet me investitorë nga Katari, të cilët kanë pasur interes për projekte zhvillimi në këtë zonë. Organet hetimore po verifikojnë ligjshmërinë e transaksioneve financiare dhe kalimin e pronave shtetërore drejt subjekteve private.
Në qendër të këtij hetimi është vënë gjithashtu Artur Shehu, i cili aktualisht banon në Shtetet e Bashkuara të Amerikës. Ai dyshohet si një figurë kyçe në drejtimin e mekanizmit të tjetërsimit të pasurive të paluajtshme në këtë zonë.
Hetimet nga SPAK dhe BKH mbeten në vijim, me synim zbardhjen e plotë të skemës së përfitimit dhe përcaktimin e përgjegjësive ligjore për personat e përfshirë.
Përditësime
Prokuroria e Posaçme (SPAK) ka zhbllokuar llogaritë bankare të kompanisë Albania Land Development, pasi ka identifikuar investitorët nga Katari, vëllezërit Ramez al-Khayyat dhe Mohammad al-Khayyat. Vendimi i heq sekuestron shumës prej rreth 200 milionë dollarësh, e cila ishte bllokuar në Bankën Kombëtare Tregtare (BKT).