Asllani dhe Hysaj në formacionin më të mirë të Ligës së Kombeve

Mesfushori Kristjan Asllani dhe mbrojtësi Elseid Hysaj janë renditur përkrah yjeve të futbollit evropian në formacionin më të mirë të raundit të katërt të Ligës së Kombeve, sipas vlerësimeve të faqes së specializuar Sofascore. Kristjan Asllani u shpall protagonist në fitoren 2-1 të Shqipërisë kundër San Marinos, ku shënoi dy gola: të parin në minutën e 11-të me një goditje nga distanca dhe të dytin nga pika e bardhë e penalltisë në minutat shtesë. Ky vlerësim maksimal me notën 10 e vendos atë në të njëjtin nivel me yllin francez Michael Olise. Për 24-vjeçarin, kjo paraqitje pason sukseset e mëparshme në këtë cikël, përfshirë vlerësimin 8.5 në fitoren 2-0 ndaj Bjellorusisë. Elseid Hysaj, i cili u vlerësua me notën 7.9, luajti si titullar dhe plotësoi gjithë takimin ndaj San Marinos. Kontributi i tij në këtë fushatë vjen pas një tjetër paraqitjeje të mirë në ndeshjen e parë ndaj Bjellorusisë, ku asistoi në golin e Ernest Muçit. Sipas raportimeve, Shqipëria, së bashku me Zvicrën dhe Francën, janë ekipet e vetme që përfaqësohen me nga dy futbollistë në këtë formacion. Pas katër ndeshjeve, Shqipëria kryeson grupin C1 me 9 pikë.