Kuvendi i Kosovës nuk arriti të zgjedhë dy gjyqtarë të rinj për Gjykatën Kushtetuese, pasi asnjë kandidat nuk mori votat e mjaftueshme në procesin e votimit të fshehtë. Kryetarja e Kuvendit, Albulena Haxhiu, konfirmoi se konkursi do të përsëritet dhe u bëri thirrje komisionit përkatës të ndërmarrë veprimet e nevojshme për publikimin e thirrjes së re.
Procesi u zhvillua në katër runda, ku kandidatët eliminohen gradualisht sipas numrit më të ulët të votave.
Rezultatet e votimit
• Raundi i parë (114 deputetë): Benina Kusari 3 vota, Emine Avdyli Pozhari 58 vota, Flamur Mrasori 47 vota, Jorida Xhafaj 57 vota, Shpresa Emra 14 vota, Zahir Çerkini 43 vota (2 fletëvotime të pavlefshme).
• Raundi i dytë (115 deputetë): Emine Avdyli Pozhari 63 vota, Jorida Xhafaj 62 vota, Flamur Mrasori 42 vota, Zahir Çerkini 42 vota, Shpresa Emra 12 vota (eliminuar Benina Kusari).
• Raundi i tretë (114 deputetë): Emine Avdyli Pozhari 60 vota, Jorida Xhafaj 63 vota, Flamur Mrasori 49 vota, Zahir Çerkini 48 vota (3 fletëvotime të pavlefshme; eliminuar Shpresa Emra).
• Raundi i katërt (115 deputetë): Jorida Xhafaj 62 vota, Emine Avdyli Pozhari 60 vota, Flamur Mrasori 51 vota (4 fletëvotime të pavlefshme; eliminuar Zahir Çerkini).
Haxhiu theksoi se, bazuar në raportin e votimit, asnjë kandidat nuk arriti pragun e kërkuar. Seanca u mbyll pas këtij procesi maratonik.