Ngjarja ka ndodhur rreth orës 20:30 të mbrëmjes së hënës, kur një person ende i paidentifikuar ka qëlluar me pistoletë në drejtim të tre shtetasve, të cilët ndodheshin në verandën e një lokali në lagjen "Vullnetari". Të plagosurit, Armand Tomorrica, Renaldo Mance dhe Bjorgi Hoxha, janë transportuar në spital për të marrë ndihmën e nevojshme mjekësore dhe ndodhen jashtë rrezikut për jetën.
Në momentin e sulmit, në brendësi të lokalit ndodhej një oficer policie jashtë shërbimit. Ai ka reaguar menjëherë duke u vënë në ndjekje të autorit. Gjatë largimit, autori ka hedhur armën e zjarrit, e cila është sekuestruar nga forcat e rendit si provë materiale, ndërsa vetë autori ka arritur të largohet në thellësi të lagjes.
Aktualisht, zona është rrethuar nga forca të shumta policore, të cilat vijojnë kontrollet intensive për lokalizimin dhe kapjen e autorit. Grupi hetimor, nën drejtimin e Prokurorisë, po punon për zbardhjen e plotë të rrethanave të ngjarjes dhe identifikimin e autorit.
Përditësime
Hetimet për atentatin me armë zjarri në Elbasan kanë zbardhur detaje të reja mbi dinamikën e ngjarjes. Sipas burimeve, objektivë të sulmit dyshohet të kenë qenë shtetasit Tomorrica dhe Mance, si pasojë e një konflikti të mëparshëm, ndërsa kamarieri mbeti i plagosur aksidentalisht. Në vendngjarje, policia sekuestroi 6 gëzhoja. Autoritetet bëjnë me dije se autori dyshohet të ketë qenë i maskuar me paruke dhe veshur me xhup. Një oficer policie, i cili ndodhej jashtë shërbimit në shoqërinë e dy fëmijëve të tij, ishte gjithashtu i pranishëm në vendin e ngjarjes. Të tre të plagosurit janë larguar nga spitali pas marrjes së ndihmës mjekësore.
Hetuesit kanë zbuluar se autori i atentatit në Elbasan është maskuar si grua, duke përdorur një maskë silikoni dhe paruke. Pasi ka shkëmbyer fjalë me viktimat, autori ka qëlluar me 6 plumba të një kalibri ende të papërcaktuar. Policia e Shtetit po heton trafikun e narkotikëve si pistën kryesore. Lidhur me objektivin e atentatit, versionet mbeten kontradiktore: një burim identifikon Tomorricën dhe Mancen si shënjestra, ndërsa një burim i dytë sugjeron se shënjestra ishte një person tjetër i pranishëm në vendngjarje.