Ngjarja e rëndë u regjistrua mbrëmjen e së hënës në një bar-kafe në lagjen Vullnetari, e njohur ndryshe si zona e Banesave në Elbasan. Sipas dëshmive, autori u afrua në tavolinën ku ndodheshin të rinjtë dhe, pas një konflikti verbal, qëlloi me armë zjarri. Të plagosurit Armando Tomorrica, Renaldo Mance dhe Biorgi Hoxha u dërguan në Spitalin Rajonal të Elbasanit dhe ndodhen jashtë rrezikut për jetën.
Hetuesit janë duke analizuar pamjet e kamerave të sigurisë për të rindërtuar dinamikën e ngjarjes. Autori është filmuar duke u larguar në këmbë nëpër rrugicat e lagjes, pasi shmangu ndjekjen e një punonjësi policie që ndodhej rastësisht pranë vendngjarjes. Gjatë arratisjes, i dyshuari hodhi armën e krimit, e cila tashmë është sekuestruar nga Policia Shkencore për ekspertizë balistike. Në vendngjarje janë gjetur 6 gëzhoja.
Pista kryesore e hetimit lidhet me konfliktet mes grupeve kriminale. Kastriot Kila është një personazh i njohur për autoritetet për shkak të përplasjeve të tij të hershme me Suel Çelën. Nipi i Ot Kilës, i cili u mor në pyetje nga policia, ka deklaruar se nuk ka konflikte personale dhe nuk e njeh autorin. Grupi hetimor po verifikon gjithashtu mundësinë që autori të ketë ngatërruar shënjestër, ndërkohë që përgatitja logjistike me maskë silikoni dhe paruke sugjeron një planifikim të detajuar të atentatit.