Një incident ka ndodhur pasditen e sotme në zonën e fshatit Novoselë, ku një automjet është shkrumbuar pothuajse plotësisht si pasojë e një zjarri të fuqishëm.
Sipas të dhënave paraprake, dyshohet se flakët janë shkaktuar nga një shkëndijë elektrike në pjesën e motorit, ndërkohë që mjeti ishte në lëvizje. Drejtuesi i automjetit, sapo ka konstatuar daljen e flakëve, ka ndaluar mjetin dhe ka dalë prej tij në kohë, duke shpëtuar kështu mrekullisht pa pësuar asnjë lëndim.
Menjëherë pas njoftimit, në vendngjarje kanë mbërritur forcat zjarrfikëse. Pavarësisht ndërhyrjes së shpejtë, flakët ishin përhapur me intensitet të lartë, duke bërë që automjeti të dëmtohej rëndë.
Po ashtu, në vendngjarje kanë mbërritur shërbimet e Policisë, të cilat kanë nisur veprimet procedurale dhe po marrin në pyetje drejtuesin e mjetit për të hedhur dritë mbi rrethanat e plota të ngjarjes. Deri në këto momente, autoritetet nuk kanë raportuar për asnjë person të lënduar.