Autoritetet kufitare të Serbisë nuk lejuan hyrjen e një delegacioni nga Republika e Kosovës, i cili po udhëtonte drejt Preshevës për të shprehur ngushëllime kryetares së kësaj komune, Ardita Sinani, pas vdekjes së babait të saj. Delegacioni përbëhej nga deputetet e Kuvendit të Kosovës, Arbërie Nagavci, Fatmire Mullhaxha Kollçaku dhe Liza Gashi, të shoqëruara nga ambasadori i Kosovës në Beograd, Jetish Jashari, dhe këshilltari i kryeministrit Albin Kurti, Ragmi Mustafi.
Sipas njoftimeve, delegacioni u mbajt në vendkalimin kufitar në Depcë për disa orë, pa marrë një shpjegim mbi arsyet e ndalimit, përpara se t'u komunikohej refuzimi i hyrjes në territorin e Serbisë. Vizita ishte deklaruar si personale dhe me karakter human, pa ndonjë agjendë politike. Për të mundësuar takimin, Ardita Sinani udhëtoi së bashku me familjarët e saj drejt pikës kufitare në Depcë, në territorin e Kosovës, ku edhe pranoi ngushëllimet nga anëtarët e delegacionit.
Kryetarja e Preshevës, Ardita Sinani, e cilësoi këtë veprim si diskriminues dhe si një ndërhyrje politike në raporte ndërnjerëzore. Nga ana e saj, Arbërie Nagavci e vlerësoi rastin si të papranueshëm dhe paralajmëroi njoftimin e autoriteteve kompetente dhe të institucioneve të Bashkimit Evropian mbi këtë ngjarje. Sipas palës kosovare, ky rast shpërfaq qasjen e autoriteteve serbe ndaj zyrtarëve dhe qytetarëve të Kosovës, pavarësisht natyrës së vizitës.