Picula: Gjendja në Serbi përkeqësohet, procesi i anëtarësimit në BE ngec prej vitesh

Tonino Picula, raportuesi për Serbinë në Parlamentin Evropian, deklaroi se reformat në këtë vend janë ngadalësuar ndjeshëm në disa segmente dhe ka regres të dukshëm në fushat e sundimit të ligjit dhe standardeve të demokracisë.

Ai foli në Komitetin për Marrëdhënie të Jashtme të Parlamentit Evropian (AFET), ku u diskutua draft-raporti vjetor për Serbinë. «Që nga miratimi i raportit tonë për Serbinë vitin e kaluar e deri sot, gjendja në vend është përkeqësuar më shumë. Situata është jashtëzakonisht e polarizuar dhe e mbushur me tensione. Ritmi i përgjithshëm i procesit të anëtarësimit në BE ka ngecur prej vitesh», tha Picula më 17 mars 2026.

Stagnimin Picula ia atribuoi këtyre arsyeve kryesore:

• përparimit të kufizuar në dialogun për normalizimin e raporteve me Kosovën;
• mungesës së vazhdueshme të përputhshmërisë me politikën e përbashkët të jashtme dhe të sigurisë të BE-së;
• mungesës së përgjithshme të vullnetit të vërtetë politik për të ecur përpara;
• retorikës së shpeshtë kundër zyrtarëve evropianë;
• përkeqësimit të kushteve për punën e lirë të mediave dhe shoqërisë civile;
• injorimit të rekomandimeve për reformën zgjedhore.

Sipas tij, Serbia, si shtet kandidat, duhet të angazhohet në mënyrë sistematike dhe strategjike drejt anëtarësimit në BE. «Angazhimet deklarative në këto rrethana nuk mund të merren më si politikë serioze e mbylljes së syve apo e forcimit të stabilitetit si alibi nga disa aktorë evropianë. Ato nuk sollën rezultate në transformimin e vendit, përkundrazi e larguan atë nga anëtarësimi», nënvizoi ai.

Picula përmendi shembuj konkretë ku detyrimet nuk u zbatuan: mos pjesëmarrjen në samitin BE-Ballkani Perëndimor në dhjetor të vitit të kaluar dhe pjesëmarrjen në paradën ushtarake në Moskë në maj të kaluar, pavarësisht qëllimit strategjik të deklaruar për anëtarësimin në BE.