Delegacioni i Parlamentit Europian, i udhëhequr nga Tonino Picula, raportuesi për Serbinë, viziton Beogradin nga 22 deri më 24 janar. Para vizitës, presidenti serb Aleksandar Vuçiq kritikoi ashpër Piculën dhe parlamentarët europianë, duke i cilësuar si "urrejtës të Serbisë".
Vuçiqi dhe kryetarja e Asamblesë Kombëtare, Ana Brnabić, njoftuan se refuzojnë të takohen me Piculën dhe delegacionin e tij. Sipas Vuçiqit, ata "nuk na pyetën, nuk na informuan" për vizitën. Këto deklarata vijnë pas sulmeve mediatike të vazhdueshme ndaj Piculës, kroatit të emëruar raportues për Serbinë.
Në një intervistë për gazetën Večernji list, Picula deklaroi se Vuçiqi e sheh Bashkimin Evropian si një bufe: "ai zgjedh vetëm bashkëbiseduesit që i përshtaten dhe vazhdimisht i konsideron kritikët si armiq". Sipas tij, Vuçiqi i trajton në të njëjtën mënyrë rivalët politikë vendas dhe qytetarët e Serbisë. Picula priti më shumë sulme të tilla dhe vuri në dyshim dëshirën e Serbisë për anëtarësim në BE, duke thënë se deklarativisht po, por në praktikë jo.
Vizita ishte njoftuar më herët, por tensionet u rritën për shkak të kritikave të Vuçiqit ndaj Piculës që nga emërimi i tij.