Autoritetet spanjolle kanë shkatërruar një grup kriminal shqiptar të specializuar në vjedhje të banesave luksoze në provincën e Malagës, në jug të vendit. Operacioni, i quajtur Despropósito, u finalizua të hënën dhe rezultoi me arrestimin e pesë personave si dhe hetimin e njëmbëdhjetë të tjerëve, kryesisht shqiptarë.
Grupi vepronte duke monitoruar për ditë të tëra milionerët në zonën e Costa del Sol-it, duke mësuar adresat dhe rutinën e tyre ditore. Pas kësaj, anëtarët zhvillonin plane për të hyrë në banesa dhe për të vjedhur sende me vlerë të lartë, si bizhuteri, orë luksoze dhe para cash. Për të shmangur identifikimin nga kamerat, ata përdornin maska prej lateksi dhe paruke.
Gjatë hetimit, policia identifikoi disa prona në zonat e Marbellës dhe Mijasit, të dyshuara si baza operative të grupit. Kontrollet e këtyre banesave çuan në sekuestrimin e 39.465 eurove para cash, tre armëve zjarri, municioneve, dy automjeteve luksoze të vjedhura, shtatë targave të falsifikuara dhe orëve luksoze nga marka të njohura. Vlera totale e sendeve të sekuestruara kap shifrën mbi 80 mijë euro, të cilat u kthyen pronarëve të ligjshëm.
Guardia Civil ka njoftuar se operacioni u zhvillua pas raportimeve të shumta nga viktimat dhe u koordinua nga njësitë e Stacionit Kryesor të Mijasit. Kjo ndërhyrje parandaloi grabitje të mëtejshme në zonën e pasur të Costa del Sol-it, ku banda kishte kryer disa vjedhje të mëparshme.