Policia e Durrësit finalizoi operacionin e koduar Target për zbardhjen e vjedhjeve në banesa, duke vënë në pranga shtetasin D. C., 29 vjeç, banues në Sukth.
Nga hetimet e specialistëve për Hetimin e Krimeve të Komisariatit të Policisë Durrës, në drejtimin e Prokurorisë, dyshohet se 29-vjeçari ka kryer tre vjedhje në banesën e një shtetaseje italiane në Fermë Sukth, si dhe vjedhje në pesë banesa të tjera, gjatë periudhës dhjetor 2025-janar 2026. Ai ka marrë shuma parash, bizhuteri dhe pajisje të ndryshme.
Gjatë kontrollit fizik pas ndalimit, 29-vjeçarit iu gjetën një pistoletë sportive pa leje, një maskë dhe një palë doreza, të cilat dyshohet se i përdorte për kryerjen e vjedhjeve.
Materialet iu referuan Prokurorisë së Durrësit për veprat penale "Vjedhja", kryer më shumë se një herë, dhe "Prodhimi dhe mbajtja pa leje e armëve të gjuetisë dhe sportive". Hetimet vazhdojnë për zbardhjen e vjedhjeve të tjera të mundshme.