Policia e Shtetit finalizoi fazën e shtatë të operacionit të koduar Relay 7, duke vënë në pranga shtetasen Elsona Çoba, 35 vjeçe, banuese në Rrogozhinë me origjinë nga Laçi. Ngjarja ndodhi në afërsi të Lezhës, ku ajo u kap në flagrancë teksa transportonte me automjet tip BMW pesë emigrantë, të cilët i kishte marrë në Vorë.
Specialistët e Seksionit për Hetimin e Trafiqeve, në bashkëpunim me Drejtorinë Vendore të Policisë Lezhë, vepruan pas një informacioni për transportin ilegal të emigrantëve drejt vendeve të Bashkimit Evropian kundrejt pagesash. Nga hetimet dyshohet se Çoba u kishte marrë secilit prej emigrantëve nga 2500 euro, me premtimin se do të mundësonte kalimin e tyre në Itali. Automjeti u sekuestrua në cilësinë e provës materiale.
Skema e dyshuar e trafikut
Burime nga grupi hetimor bëjnë të ditur se Çoba dyshohet se prej tre vitesh merrte pjesë në këtë veprimtari. Ajo transportonte emigrantët nga Gjirokastra deri në pikën kufitare të Muriqanit. Pas një ndalese disaorëshe në Vorë, emigrantët shpërndaheshin në automjete të tjera dhe merreshin nga grupe të tjera kriminale për kalimin drejt Italisë si destinacion final. Për të shmangur vëmendjen e policisë, ajo merrte deri në tre makina me qira në Tiranë, Rinas ose Fushë Krujë. Emigrantët e kapur janë nga Egjipti dhe Jemeni.
35-vjeçarja nuk ka pranuar të flasë para hetuesve për rrjetin e trafikantëve. Policia heton të paktën dy persona të tjerë të dyshuar si bashkëpunëtorë.
Materialet procedurale iu referuan Prokurorisë së Tiranës për veprime të mëtejshme.