Policia e Tiranës ka finalizuar operacionin e koduar "Relay 4", si rezultat i hetimeve të kryera gjatë disa javëve me metoda speciale.
Specialistët e Seksionit për Hetimin e Trafiqeve të Paligjshme arrestuan Arlen Coku, 38 vjeç, banues në Tiranë, dhe Endrit Tota, 35 vjeç, banues në Kukës. Ata bashkëpunonin për të dhënë ndihmë në kalimin e paligjshëm të kufijve.
Në aksin rrugor Tiranë-Durrës u ndalua automjeti i drejtuar nga 38-vjeçari, me 4 emigrantë pasagjerë, të cilët po transportoheshin drejt Kukësit. Atje, 35-vjeçari do t’i ndihmonte për të kaluar drejt vendeve të BE-së, përmes Kosovës.
U sekuestruan automjeti me të cilin transportoheshin emigrantët dhe 2 celularë.
Në bashkëpunim me Prokurorinë, vijojnë hetimet për të identifikuar shtetas të tjerë të përfshirë. Materialet procedurale iu referuan Prokurorisë së Tiranës për veprime të mëtejshme.