Strukturat e Policisë së Tiranës kanë finalizuar operacionin e koduar Relay 6, duke vënë në pranga dy shtetas të dyshuar për transport të emigrantëve të paligjshëm drejt vendeve të Bashkimit Evropian.
Ngjarja ndodhi më 8 shkurt 2026 në zonën e Mbikalimit të Kasharit. Specialistët e Seksionit për Trafiqet e Paligjshme në Drejtorinë Vendore të Policisë Tiranë kapën në flagrancë shtetasit Arselajd Morina, 24 vjeç, dhe Ilzon Vllacaj, 22 vjeç, banues në Kukës. Ata transportonin me një automjet pesë emigrantë, të cilëve u kishin kërkuar nga 2700 euro secili me premtimin se do t’i dërgonin në Francë.
Në cilësinë e provës materiale u sekuestruan një automjet dhe dy aparate celularë. Hetimet për dokumentimin e plotë të veprimtarisë kriminale dhe identifikimin e personave të tjerë të përfshirë vazhdojnë. Materialet i janë kaluar Prokurorisë për veprime të mëtejshme.
Ky operacion vjen në vijim të goditjeve të njëpasnjëshme kundër kontrabandës së emigrantëve nga vendet e treta drejt vendeve të BE-së.