Policia e Tiranës arrestoi në flagrancë 26-vjeçarin turk G. K., i cili transportonte 3 emigrantë të paligjshëm në aksin rrugor Kashar-Thumanë.
Ngjarja ndodhi në kuadër të fazës së nëntë të operacionit policor Relay. Sipas njoftimit zyrtar, i riu merrte 3000 euro për person për t’i ndihmuar emigrantët të kalonin kufirin drejt shteteve të Bashkimit Evropian në mënyrë të kundërligjshme. Specialistët e Seksionit për Hetimin e Trafiqeve të Paligjshme vepruan pas informacionit të siguruar në rrugë operative.
Gjatë operacionit u sekuestruan automjeti me të cilin transportoheshin emigrantët dhe 3 celularë. Emigrantët u proceduan sipas ligjit.
Në bashkëpunim me Prokurorinë, vijojnë hetimet për të identifikuar e arrestuar shtetas të tjerë të përfshirë. Materialet iu referuan Prokurorisë së Tiranës për veprime të mëtejshme.
Përditësime
Euronews Albania ka identifikuar emrin e plotë të të arrestuarit si Gurkan Kaya, 26-vjeçarin turk të kapur në Tiranë për transport emigrantësh të paligjshëm.