Policia e Tiranës ka arrestuar në flagrancë shtetasin Kreshnik Gaxha, 31 vjeç, banues në Kukës, në rrugën e vjetër të Rinasit, ndërsa transportonte me automjetin e tij gjashtë emigrantë nga Egjipti. Ai dyshohet se vepronte kundrejt pagesës për t’i drejtuar emigrantët drejt Kukësit, me qëllim kalimin ilegal fillimisht në Kosovë dhe më pas në shtetet e Bashkimit Evropian.
Specialistët e Seksionit për Hetimin e Trafiqeve të Paligjshme finalizuan fazën e tretë të operacionit “Relay”, pas një hetimi njëmujor të zhvilluar me metoda speciale, në koordinim me Prokurorinë e Tiranës. Gjatë operacionit u sekuestruan automjeti me të cilin transportoheshin emigrantët dhe dy celularë.
Policia njofton se vijon hetimet për të identifikuar dhe nxjerrë përpara përgjegjësisë penale shtetas të tjerë të mundshëm të përfshirë në këtë veprimtari kriminale. Materialet procedurale iu referuan Prokurorisë së Tiranës për veprime të mëtejshme.