Specialistët e Seksionit për Hetimin e Trafiqeve në Policinë e Tiranës kanë finalizuar operacionin policor të koduar "Organizatori", pas informacioneve të siguruara në rrugë operative. Në pranga ka rënë shtetasi egjiptian A. H., 34 vjeç, banues në Krujë, i cili dyshohet se kishte ndërtuar një skemë për të ndihmuar shtetas të huaj, kryesisht nga Egjipti, të kalonin kufijtë në mënyrë të paligjshme kundrejt pagesave.
Sipas hetimeve, për të shmangur kontrollet policore, 34-vjeçari nuk i transportonte emigrantët në grupe, por i lëvizte ata një e nga një drejt zonave kufitare, me synim kalimin drejt vendeve të Bashkimit Evropian. Arrestimi i tij në flagrancë ndodhi në autostradë, në afërsi të Rinasit, teksa po udhëtonte me automjet drejt Shkodrës.
Gjatë operacionit, policia sekuestroi në cilësinë e provës materiale aparatin celular të të arrestuarit. Pajisja pritet të shërbejë për të zbardhur komunikimet dhe për të identifikuar bashkëpunëtorë të tjerë në këtë rrjet të trafikimit të qenieve njerëzore.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, e cila do të vijojë hetimet për dokumentimin e plotë të veprimtarisë kriminale.