Policia Kufitare Sarandë ka finalizuar operacionin e koduar "Distanca" dhe ka arrestuar në flagrancë Erind Yzeiraj, 27-vjeçar banues në Patos, gjatë natës në fshatin Xarrë.
Ai transportonte me automjet, kundrejt pagesës, 13 emigrantë nga Egjipti, të cilët dyshohet se kishin hyrë ilegalisht në Shqipëri nga kufiri me Greqinë dhe synonin të kalonin në vendet e Bashkimit Evropian.
Aksioni u zhvillua pas informacioneve të siguruara në rrugë operative dhe kontrolleve intensive në brezin kufitar.
Si provë materiale u sekuestrua automjeti me të cilin kryhej transporti.
Në njoftimin zyrtar, policia shkruan se vijojnë hetimet për dokumentimin e veprimtarisë kriminale dhe identifikimin e shtetasve të tjerë të mundshëm të përfshirë.
Materialet procedurale iu referuan Prokurorisë së Sarandës për veprën penale "Ndihma për kalim të paligjshëm të kufijve".