Seksioni i Hetimit dhe ZMPKT i Drejtorisë Vendore për Kufirin dhe Migracionin në Korçë organizoi dhe finalizoi operacionin policor të koduar "Borders", pas informacioneve të siguruara në rrugë operative mbi veprimtarinë e paligjshme të transportimit të emigrantëve. Në pranga përfundoi shtetasi J. S., 27 vjeç, banues në Tepelenë, i cili u kap në flagrancë në fshatin Drenovë.
Sipas njoftimit zyrtar, 27-vjeçari po transportonte me automjet, drejt Shkodrës, 11 shtetas të huaj, përkatësisht 10 nga Bangladeshi dhe 1 nga Pakistani. Emigrantët kishin hyrë ilegalisht në territorin shqiptar përmes pikës kufitare të Kapshticës dhe synonin të kalonin kufirin në drejtim të Malit të Zi. Policia sekuestroi automjetin dhe një celular që shërbenin si prova materiale.
Në lidhje me këtë rast, autoritetet kanë shpallur në kërkim edhe dy persona të tjerë, të cilët dyshohet se bashkëpunonin me 27-vjeçarin për transportimin e emigrantëve kundrejt pagesës:
• F. S., 31 vjeç, banues në Fier;
• G. H., 58 vjeç, banues në Lushnjë.
Materialet procedurale janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprën penale "Ndihma për kalim të paligjshëm të kufijve". Puna për dokumentimin e plotë të veprimtarisë kriminale dhe kapjen e personave në kërkim vijon.