Autoritetet turke kanë ndaluar të mërkurën kryetaren e bashkisë së Üsküdarit në Stamboll, Sinem Dedetaş, anëtare e Partisë Popullore Republikane (CHP), në kuadër të një hetimi për shkelje të dyshuara në procedurat e lejeve të ndërtimit dhe të shfrytëzimit të objekteve. Përveç Dedetaş, në pranga kanë rënë edhe pesë persona të tjerë, ndër të cilët një nënkryetar bashkie, sekretari i bashkisë, një arkitekt, një përfaqësues i pasurive të paluajtshme dhe një kontraktor.
Sipas raportimeve të transmetuesit turk NTV, operacioni policor u shtri në 11 adresa të ndryshme në Stamboll, ku u sekuestruan dokumente, dosje dhe materiale digjitale. Hetimi dyshohet se përqendrohet mbi një skemë ku kontraktorëve u kërkohej nënshkrimi i kontratave të konsulencës si kusht për miratimin e lejeve të ndërtimit nga ana e bashkisë.
Ky zhvillim shënon një kapitull të ri në hetimet ndaj bashkive të drejtuara nga opozita, të cilat u konsideruan si fitore simbolike për CHP-në në zgjedhjet lokale të vitit 2024, pasi kishin qenë për kohë të gjatë bastion i Partisë për Drejtësi dhe Zhvillim të presidentit Recep Tayyip Erdoğan. Opozita i ka hedhur poshtë akuzat, duke i cilësuar ato si të motivuara politikisht. Nga ana tjetër, qeveria turke vazhdon të mbajë qëndrimin se gjyqësori në vend është i pavarur dhe po vepron mbi baza ligjore.
Vlen të përmendet se ky është zhvillimi më i ri në një varg hetimesh ndaj zyrtarëve lokalë. Një operacion i ngjashëm në të njëjtën komunë ishte zhvilluar edhe në muajin prill, ku ishin ndaluar dhjetëra persona të tjerë, por atëkohë Sinem Dedetaş nuk ishte pjesë e të ndaluarve.