Një avion me helika i tipit ATR 42-600, në pronësi të kompanisë Olympic Air (pjesë e grupit AEGEAN), u përball me një defekt teknik pak pas ngritjes nga aeroporti “Diagoras” në Rodos. Avioni po kryente fluturimin OA94 me destinacion Karpathosin, me ndalesa të mëtejshme në Kasos dhe Sitia.
Sipas njoftimit zyrtar të AEGEAN, pilotët ndoqën protokollet e sigurisë pasi morën një sinjal për një anomali të mundshme në qarkun e lubrifikantit të njërit prej motorëve. Kapiteni mori vendimin për t’u rikthyer menjëherë në pistën e aeroportit të Rodosit. Në tokë, autoritetet aktivizuan planin e emergjencës, duke pozicionuar shërbimet zjarrfikëse dhe autoambulancat për çdo rast, megjithatë, ulja e avionit u krye pa vështirësi dhe ndërhyrja nuk ishte e nevojshme.
Të gjithë 33 pasagjerët dhe 3 anëtarët e ekuipazhit zbritën të sigurt nga mjeti fluturues. Pas incidentit, kompania dërgoi një avion zëvendësues nga Athina për të transportuar udhëtarët drejt destinacioneve të tyre përfundimtare. Një hetim i hollësishëm teknik ka nisur për të përcaktuar shkaqet e sakta të defektit në sistemin e vajit.
Ndërsa raportimet e shumta mediave referuan shfaqje të flakëve në motor bazuar në dëshmi vizuale, deklaratat zyrtare dhe disa burime të tjera u fokusuan ekskluzivisht te defekti teknik në sistemin e lubrifikimit.
Përditësime
Grupi AEGEAN konfirmoi se avioni ishte pjesë e flotës së tij, duke saktësuar se incidenti ndodhi gjatë fluturimit drejt Karpathosit, me destinacione të planifikuara më pas drejt Kasos dhe Sitia. Pilotët çaktivizuan motorin me defekt dhe kryen uljen emergjente në aeroportin Diagoras të Rodosit duke përdorur vetëm motorin tjetër. Pavarësisht pretendimeve të kompanisë për një defekt teknik në sistemin e lubrifikimit, dëshmitë vizuale të pasagjerëve konfirmojnë shfaqjen e tymit gjatë fluturimit.